سين سؤال لماذا لايعمل المعوقون ؟؟؟؟؟؟؟؟؟؟؟؟؟؟؟؟؟

عدد الرسائل : 1 تاريخ التسجيل : 28/12/2007

بسم الله الرحمن الرحيم
الاخوه الاعزاء اجد نفسي صغيرا وانا بينكم فانتم قامات عاليه في كل المجالات واسماء مشهود لها بالابداع في شتي المجالات وهذا اول موضوع اكتبه للمنتديات طبعا اخوكم عضو جديد لنج اعود للموضوع لماذا لايعمل المعوقين ؟ دام فضلكم سادتي اصحاب الاعمال واحدثكم عن نفسي انا خريج اذاعه وتلفزيون وكنت الرابع علي دفعتي في الامتحانات النظريه والاول علي دفعتي في الامتحانات العمليه الاانني عندما اقدم الي اي عمل في نفس المجال يكون الرد جاهزا من اصحاب هذه الاعمال احدهم قال لي ان الاذاعه في الدور الرابع وان الاسنسير عطلان وللغرابه ان من ضمن شهاداتي التي قدمتها له شهاده من قصر الشباب والاطفال انني درست فيها دراما علما ان قسم الدراما في القصر كان في الدور الخامس عذرا نسيت ان اخبركم انني معوق حركيا ولكني اسير بعكازين وحتي الكوره بلعبها انا حااواصل ليكم قصه البحث عن عمل المره الجايه لكن عليكم الله الزول ده مابالغ فيني اتمني الرد علي الموضوع لكي تعم الفائده وانتظرو بقيه الحلقات كان فضل في العمر بقيه

الحلقه الثانيه
صباح الخير عليكم امبارح وقفنا في حته انو صاحب العمل قال لي انو الاذاعه في الدور الرابع والاسنسير عطلان وقلت ليكم انو من ضمن شهاداتي اني درست في قصر الشباب والاطفال دراما في الدور الخامس وكنت بطلع بالسلم قمت قلت لي شكرا ليك وده اعتذار بي ادب وعلي العموم انا قبلتو وبيني وبين نفسي اتسالت الزول ده الشهادات دي ما قراها ولا ......... خلوها مستوره المهم ياساده قدمت في احدي القنوات الفضائيه السودانيه الجديده لكن الرد كان بي نفس الطريقه اوزي ما قلت في سري اعتذار بي ادب وتعالو شوفو المشكله الكبيره في المحطه التالته في رحله البحث عن عمل قدمت في اذاعه متخصصه لكن الرد ماكان انو انا معوق او انو الاذاعه فوق الرد ياساده انو الاذاعه ما عندهم تخصص اخراج عليكم الله ده فهم ده يعني سعادتو احسن من كل القنوات والاذاعات ولازم يبتكر فهم جديد في الاعلام وانو مايكون عنده التخصص الانا متخصصه وبيعتبرو ناس الاعلام اهم تخصص وما بيخشو لي الا الطلبه البجتازو امتحانات صعبه جدا (بلدنا دي مابلد العبقريات) وبسالكم حصل قبل كده شاهدتو او سمعتو برنامج مافيهو مخرج واواصل ليكم بكره كان حيينا

الحلقه الثالثه
بسم الله الرحمن الرحيم
اسمحو لي في البدايه ان اهدي هذه الابيات الي كل من تكرم بالترحيب بي في المنتديات والي كل من رد علي سلسله الموا ضيع التي كتبتها بعنوان سين سؤال لماذا لايعمل المعوقين
وااسف لتحريف الابيات
سروري من الدنيا (اهتمام) احبتي
وغايه مقصودي (اجبتم )دعوتي
الا ايها الاحباب جودو وشرفو
لتزداد افراحي وتجلو مسرتي
شكر جميلا لكل الجميلين الذين كتبو وللذين خانهم التعبير والي كل من كلف نفسه والقي نظره علي الكتابات التي كتبتها والي كل من رحب بي في المنتديات
ونرجع لي موضوعنا وقولو ياساتر المحطه الثالثه كانت شركه انتاج اعلامي وكانت في الدور الارضي ههههههههههه حلوه الدورالارضي دي المهم قدمت ورقي علي اساس انهم دايرين مخرجين وكده واخوكم طوالي خش في دور شكرالله خلف الله وخلفت رجلي وخشيت المعاينه بالمناسبه الرجل الخلفتها كانت المعوقه لزوم قشره وكده واجتزت المعاينه بفضل الله لكن وبعد ان ظهرت النتيجه واتضح انو اخوكم ناجح قالو لي طبعا طبيعه العمل هنا عندنا ضاغطه ولازم الزول يكون هنا بي صفه مستمره ووووووو(يعني برضو اعتذار بي ادب ) المهم انا قلت للمسئول من الشركه انا البعرفو شغل الاعلام كلو ضاغط وكونو انا جيت قدمت بالتاكيد بكون عارف مدي صعوبه العمل وانا قبل كده كنت شغال في دراما تبع احدي المنظمات شغال فيها اربعه ادوار م مخرج وماكيير وممثل وريبوتر المهم انا قبلت اعتذارك وخير ومشيت زي مابقولو المصريين (قفاي يقمر عيش) ونواصل في الحلقه الجايه وبالمناسبه في بوادر لي شغل ادعو معاي ربنا يتمو قولو اميين

الحلقه الرابعه
بسم الله الرحمن الرحيم

خليتكم الحلقه الفاتت في شركه الانتاج الاعلامي وقلت ليكم الحصل المهم بعد مده كده ضربت لي واحده زميلتنا كانت معانا في الجامعه وقالت لي انو في شركه دايرين موظفين بتاعين علاقات عامه بالمناسبه انا درست دبلوم علاقات عامه في جامعه السودان ومشيت قدمت المره دي ماقالو لي الشركه في الدور الرابع ولا طبيعه العمل ضاغطه ظهرت حاجه جديده الترحيل وختو عشرين خط تحت الكلمه قالو لي طبعا الشركه في ام درمان وانت ساكن في الخرطوم وما حتقدر تجي في المواعيد ونحن مابنملك ترحيل حاليا وكده بي كل بساطه الجماعه اتملصو مني مع انو انا قلت ليهم مستعد انكم تجربوني لي فتره تلاته شهور لو جيت متاخر يوم واحد اقيلوني لكن حتي دي ما قبلو بيها ما النيه مبيته اها انا قمت طوالي قررت في لحظه ياس كده انو ما اقدم لي اي شغل ولحدي ما جات المحطه الاخيره والحا اكلمكم بيها باكر كان حيينا

الحلقه الخامسه
بسم الله الرحمن الرحيم
المحطه الاخيره كان عمل حر او بالاصح في واحد عنده محل بتاع تصوير مناسبات (فيديو) المهم مشيت لي عن طريق احد اصدقائي وبعد اتفقنا انو اشتغل معاه اتفاجات بعد تلاته يوم شغل انو قال لي وبي كل صراحه انك معوق والشغل ده مابتقدر عليهو وانا داير زول سليم انا ماحا اعلق علي القالو اخليكم انتو تعلقو بس قلت لي بي كل اللغات البعرفها شكرا او ثانك يو او ميرسي بوكو او مولتو غراتسي وصلت المعلومه ياحبيب اليس من حقنا ان نعمل ؟ هل الاعاقه سبب في عدم كسب الرزق؟ هل تضمن ان تظل انت سليما الي الغد ؟هل العيب فينا اننا خرجنا الي هذه الحياه ولم نتقوقع ونصبح بعيدين عن الناس؟ هل ندع الناس تتحكم في مصائرنا دون ان نقول لا ؟ والحمد لله اتي الفرج وقبل ثلاثه ايام من الرائع الاستاذ معتصم الجعيلي فلقد قدمت اوراقي لديهم في هارموني وبذلت معي الانسانه بكل ماتعني الكلمه الاخت هاديه المذيعه ومسئوله العلاقات العامه في القناه مجهودات جباره وقمت باعداد برنامج سيري النور قريبا لكي يرو قدراتي ومن ثم اتوظف عندهم بعد ان اثبت كفائتي لم ينظرو لي بتلك النظره السطحيه ولم يعتبروني معاقا حتي ان الاستاذ معتصم الجعيلي قال لي ( ان هارموني لاتعرف كلمه معاق بل ذوي الاحتياجات الخاصه وان كلمه معاق محرم نطقها هنا) ومن باب ان الذي لايشكر الناس لايشكر الله اشكر الاخت هاديه علي اهتمامها والاستاذ معتصم الجعيلي مدير عام القناه علي الثقه الغاليه واتمني ان اكون عند حسن ظنهما وفي امان الله

كانت هذه رحله بحثي عن عمل والحمدلله انا الان اعمل في قناه هارموني الفضائيه كمخرج ومعد ولي برنامج قد تكونو شاهدتمونه اسمه شنه ورنه اقوم باخراجه وفي القريب لدي برنامج اسمه harmonyclub او نادي هارموني اقوم باعداده ارجو من كل المعاقين ان لايياسو من ان يجدو عملا ولكم الود